Dokterhuet u Awaltstitel
(Tägscht & Musig: Stefan Heimoz)
Itz bisch du ungerwägs
loufsch langsam furt vom Huus
i gseh di no grad knapp zwüsche de Böim
Du hesch es nid pressant
bisch begleitet uf dym Wäg
vo Feestoub, Zwärge u Einhorntröim
Scho stapfisch Richtig Schuel
fröisch di no jede Tag
i hoffe, das wärd müglechscht lang so sy
I weiss du fingsch dy Wäg
wohäre är o füehrt
glücklech wärde isch alles, wo d söllsch derby
I weiss, du wirsch i dym Läbe
allergattig Lüt begägne
Fang nid a z verglyche
gang dy Wäg u häb chli Muet
Für mi bruchsch du ke Awaltstitel
u ke Dokterhuet
Egal was d machsch, wohäre dass du geisch
i ha di no vil lieber, als du weisch
I weiss, du wirsch i dym Läbe
allergattig Lüt begägne
Fang nid a z verglyche
gang dy Wäg u häb chli Muet
Für mi bruchsch du ke Awaltstitel
u ke Dokterhuet
Fang nid a z verglyche
lueg, s isch d Houptsach s geit dir guet
Itz bisch du ungerwägs
loufsch langsam furt vom Huus
itz gsehn i di scho nümm
zwüsche de Böim
