Algorithmus-Blues
(Tägscht & Musig: Stefan Heimoz)
Mys Selfie gseht hüt us wi nes Gspängscht
bim Touchscreen han i Berüehrigsängscht
rundume, schynt mir, isch vil z vil los
u wohär chöme all di Infos?
Weiss nid, was da eigentlech abgeit
i finge ke App, wo mers ufzeigt
Bi nümme ganz im Rhythmus
u chume nid ganz drus
i ha dr Algorithmus-Blues
Di Grätli rede gloub mitenang
ig sälber has nümm ganz i dr Hand
U ds Wätter haltet sech nid a d App
u logisch han i ke Schirm, i Depp
U gärn würd i einisch ergründe
wär u wo sy myni ächte Fründe
Bi nümme ganz im Rhythmus
u chume voll nid drus
i ha dr Algorithmus-Blues
Es fählt gar nümm so vil
u dr nöischt Musigtipp
dä geit unger d Hut...
pär Chip
Bi nümm im Läbesrhythmus
u chume voll nümm drus
i ha dr Algorithmus-Blues
