Dr Herr Meier
(Tägscht & Musig: Stefan Heimoz)
Dr Herr Meier hocket am ne Schrybtisch im ne Büro
u wartet, dass es Abe wird, s isch jede Tag eso
dört bygelet är Zahle u notiert Verluscht u Gwinn
macht sech nid zvil Gedanke, das het ja sicher e Sinn
zwar dünkts ne, o bi ihm sälber syge d Verluschte z gross
är hätt e Huufe Tröim u Frage, di lö ne nid los
Mängisch a so Täg, bim Pousetee
da het är plötzlech e gueti Idee
aber är weiss gnau, di chan är sech schänke
dr Herr Meier isch hie nid agschtellt zum Dänke
Zwüschyne het är Geischtesblitze, gseht alles ganz klar
begryfft Gott u d Wält u merkt, es wär alles wunderbar
da weiss är, wi me sött u müesst, wi alles funktioniert
Da gseht är grad es fählends 5i, wo ne irritiert
drum lat är halt syni Erkenntnis zur Philosophie
wüu är itz grad ke Zyt het, bis uf Wyteres la sy
Mängisch a so Täg, bim Pousetee
da het är plötzlech e gueti Idee
aber är weiss gnau, di chan är sech schänke
dr Herr Meier isch hie nid agschtellt zum Dänke
Är het ja schliesslech glehrt, me cha kes 5i grad la stah
u i somne Fall nid zur Tagesornig überga
so macht är sich uf d Suechi nach däm fählende Betrag
verschwindet töifer im Zahlelabyrinth, Tag für Tag
Dört suecht är das 5i u hets no nid gfunge bis hüt
U drum erfahrt d Mönschheit vo all sym Wüsse
leider nüt
