Dr Dorfsheriff
(Tägscht & Musig: Stefan Heimoz)
Ja, är treit e Cowboyhuet u roukt gärn Marlboro
wüu dört im Wilde Weschte mache sis ja o so
drum fahrt är o ne Pick-up u treit e Sheriffstärn
u bsunders a de Dorffescht treit är dä schampar gärn
Är muess gar nid i Weschte, är het ne schliesslech hie
u so guet wis deheim isch, das ischs im Weschte nie
wüu hie het är sy Ufgab, hie chan är Sheriff sy
das isch är u das blybt är, ämu ir Fantasie
Dr Dorfsheriff, dr Dorfsheriff
het immer alls im Griff
immer alls im Griff
Är gseht alls u är weiss alls, het d Ouge überall
u vor allem, wär mit wäm, weiss är immer ganz gnau
für das gits o ne Stammtisch, dört isch är gäng derby
tuet alli informiere, s muess schliesslech Ornig sy
Da füehlt är sich beruefe, das chan ihm niemer näh
sit är am ne Bundesrat mal d Hand het dörfe gä
hmm, sy Frou u syni Chind sy ender still u bleich
är isch ganz e grosse Fisch im ne ganz chlyne Teich
Dr Dorfsheriff, dr Dorfsheriff
het immer alls im Griff
immer alls im Griff
Aber är het zimli Glück, ischs nid dr Weschte hie
wüu so wild wis dört isch gsi, das ischs bi üs ja nie
süsch wäre die, won är gäng närvt, bewaffnet bis uf Zäng
u wen är nid würd ufpasse, miechs eifach einisch "päng!"