Dr Hürdestar
(Tägscht & Musig: Stefan Heimoz)
I sta ar Poschi-Haltstell u da chunnt eine derhär
sportlech-elegant u so cool wi weiss-nid-wär
är drückt hemmigslos vüre u när steit är zvorderscht a
dass är grad als 1. i ds Poschi yne cha
D Lüt närve sech u öpper fragt, was isch das für ne Löl
niemer begryft so rächt, was das eigentlech söll
da gheit ihm d Sunnebrülle abe, me kennt ne sofort
s isch öpper Prominänts, wäg sym Erfolg im Sport
Vize-Olympiasieger, e bekannte Hürdestar
sofort isch är umgä von ere Mönscheschar
u alli wei es Selfie, jede wott mit ihm uf ds Bild
klar, dass sys Vüredrücke ke Rolle meh spilt
So ne Hürdestar muess schliesslech immer zvorderscht sy
süsch isch är nümm derby, das gseh doch alli y
Ja, u für nes Selfie mit som ne berüehmte Maa
stö halt d Lüt o schampar gärn geduldig a
D Moral vo dere Gschicht, falls es eini sötti gä
als Hürdestar... darfsch jedi Hürde näh