Zytspar-Äpp
(Tägscht & Musig: Stefan Heimoz)
I ha im Äpp Store grad öppis Wunderbars entdeckt
es isch zwar ke Äpp, wo fuuli Type wi mi weckt
aber es isch eini, wo me jede Tag erfahrt
wi me effiziänt u sinnvoll müglechscht vil Zyt spart
Klar, dr Download isch am Afang scho chli müehsam gsi
mit myre uralte Software geits halt leider nid
so han i zersch mal es nöjers Händy müesse ha
aber jitze chan i mit em Zyt spare afa
Optimiere, reduziere, limitiere, kontrolliere...
aktualisiere
D Äpp, di zeigt mer, wi me nüt Unnötigs bi sech het
u si macht mer Vorschleg, wi me effiziänter redt
i bi gäng im Bild, wi me rasch vo A nach B geit
s dünkt mi, dass mys Härz dr Stress so vil besser ertreit
Logisch, dass es nume no Fertigmahlzyte git
öppis z choche wär ja würklech vergüdeti Zyt
i bringe o niemerem es Gschänkli, oder so
es isch doch vil gschyder, we me grad zur Sach cha cho
Optimiere, reduziere, limitiere, kontrolliere...
rationalisiere
Optimiere, reduziere, limitiere, kontrolliere...
mueschs eifach kapiere
Ds Beschte isch ja no, di Äpp zeigt mir jede Tag a
wi mängi Stund dass i hüt wider mal ygspart ha
nume fingt my Tochter nöjerdings, i syg e Depp
wüu, i hocki jede Tag Stunde... vor dere Äpp