Island oder so
(Tägscht & Musig: Stefan Heimoz)
D Lea het ir Schuel scho gäng e Platz am Fänschter gha
dr Chopf chli i de Wulche u nie so richtig da
si het sech denn wyt furt gwünscht, das het me sehr guet gmerkt
ja, u üsi dumme Sprüch hei das halt no verstercht
Si het i ihrer Wält gläbt, het sech zimli abgränzt
wahrschynlech het si d Schuel o 2 oder 3 Mal gschwänzt
was zellt i üser Gsellschaft, het si nid interessiert
das "Höcher, schnäller, wyter" het se halt fruschtriert
Me het se denn belächlet, me het se nid ärnschd gno
wo si het gseit, si göng itz de uf Island oder so
Island oder so
Si het denn vo Vulkän gredt, vo Wasser u vo Ys
u dört müess si itz häre, wüu hie göngs ihre mies
wüu dört nähm me no Rücksicht, bsunders uf d Natur
mir hei denn nume gfunge, di syg chli näb dr Spur
Si het verzellt vo Elfe, me gloubi dört no dra
u het nid wölle höre mit ihrem Blablabla
Mängisch wirds eim später klar u s isch nid immer schön
si isch denn gloub wyter gsi, als mir dumme Glöön
Me het se denn belächlet, me het se nid ärnschd gno
wo si het gseit, si göng itz de uf Island oder so
Island oder so
U plötzlech isch si furt gsi, ha nüt meh vore ghört
wi mir üs denn benoh hei, het mi no mängisch gstört
Hüt dänk i mängisch a se u s tuet mer gäng no leid
was mir denn alls zu ihre u über se hei gseit
Hüt würd i nümme lache, i wüsst ke Grund, wiso
i hoffe, dass sis gschafft het uf Island oder so
Island oder so
