Herzlich willkommen auf der Website von:

STEFAN HEIMOZ - Liedermacher

Chly aber gross
(4:49)

Gly einisch fat dr Ärnschd a
aber nimms nid z'schwär
chum eifach so wi d'bisch
mit em ne Lache derhär

U we mir so dür d'Wält gö
ir Stadt, im Wald, am Strand
de frag i mi, mis Chind
wär nimmt hie wän ar Hand?

Chly aber gross, chly aber gross
für mi bisch usse chly u inne gross

Wüu du eifach da steisch
egal wi dr Wind wäit
u dini Wurzle schlasch
o wener grad het dräit

Du lachisch d'Mönsche a
bringsch ds Guete i ne vüre
teil merkes u teil luege
eifach näbe düre

Chly aber gross, chly aber gross
für mi bisch usse chly u inne gross

Dis Zouberwort heisst "nei"
das isch gar nid so schlächt
o wes di Grosse närvt
hesch mängisch eifach rächt

Du geniersch di nie
z'gränne oder z‘lache
u Steine, Blätter, Glungge
si ganz wichtigi Sache

Chly aber gross, chly aber gross
für mi bisch usse chly u inne gross

Pass guet uf dass d'Tür zu dire Chindheit
o we du älter wirsch nie ganz zue geit...

Chly aber gross, chly aber gross
für mi bisch usse chly u inne gross

Dorfgschwätz
(2:42)

I ga i Coop när stahni dört mit ere Frou ar Kasse
i hätt's ja sölle wüsse, dass me da chli muess ufpasse
di Frou heisst Claudia, si isch hübsch u si chunnt us St. Galle
u chunnt mängisch dahäre wüu ihre d'Bärge so gfalle
u d'Lüt luege üs a si wüsse nid dass di Blondine
nid mi Fründin isch si isch nämlech mini Cousine
scho stecke si d'Chöpf zäme ds Leni, ds Vreni u dr Beni
we's öppis z'rede git, de wott o ds Lisi geng derbi si...

Das isch nid so schlimm
das geit verbi
u hingerdri merksch de gli
es hätt no schlimmer chönne si

Wüu ds Lisi seit's em Sepp u dä Depp verzellt's em Heidi
u die dr Wirtin u em Wirt vom Chrüz itz wüsse beidi
u gli o ds ganze Dorf dass i e nöii Fründin ha
so öppis macht sech nid so guet für ne ghüratne Ma...

Das isch nid so schlimm
das geit verbi
u hingerdri merksch de gli
es hätt no schlimmer chönne si

Es isch bekannt sone Beziehig choschtet Gäld – aah-ja!
u scho verzellt me dass i mi total verschuldet ha
es heisst i heig im Luxus gläbt s'göng um ne Million
itz weiss das jede u i ha gar nüt gha dervo i Clown...

Das isch nid so schlimm
das geit verbi
u hingerdri merksch de gli
es hätt no schlimmer chönne si

Doch wi jedi Sach muess o die e gueti Site ha:
Solang me vo mir redt, bini wenigschtens no da!

Drum isch's nid schlimm
das geit verbi
das wär's de gsi!

E Nacht...
(2:11)

E Nacht mit dir
was gäb i alls derfür
e Nacht mit dir
was gäb i alls derfür
liessisch mi ändlech i Rueh
i ha vo dir gloub langsam gnue
itz hani so töif chönne pfuuse
da wosch du um z'verrecke schmuse

E Nacht mit dir
was gäb i alls derfür
liessisch mi ändlech i Rueh
i ha vo dir de langsam gnue
roubsch mir dr Schlaf u o dr Schnuf
i halte's eifach nümme us
es füechts Müntschi, schmatz
du bisch halt ganz e heissi Chatz

Mi Chopf unger d'Dechi z'ha
nützt nüt, du bisch ja ging no da

E Nacht mit dir
was gäb i alls derfür
du gisch alls, bisch lieb u zärtlech
di Hunger isch so unersättlech
du wosch mi eifach nümm la ga
werum hani nume d'Tür offgla!
Du tuesch di Chopf fescht a mir ribe
bis i dir ändlech Whiskas gibe
bis i dir ändlech Whiskas gibe

Herr Sauber & Herr Reinig
(3:35)

Dr Herr Sauber het sone nöii Errungeschaft:
Bevor är sich's aube ufem Sofa gmüetlech macht
geit är vorusse no chli Herbschtloub ga jage
däm Gnusch vo dene Blätter geit's ändlech mal a Chrage
Für ganzi Arbeit z'leischte nimmt är statt em ne Bäse
kes Bürschtli u kes Schüfeli, sondern grad es Loubgebläse

E Motor mit em ne Rohr
e Fröid für Oug und Ohr
är blaset di Blätter a d'Wang
u nimmt als motivierte Pensionierte
ds Wätter sälber i d'Hang

Si Nachber, dr Herr Reinig het itz o sones Grät
zfride, glücklech, lut dröhnet är vo früech bis spät
mit sim Loubbläser gäge d'Blätter, eine gäge alli
doch überleit sech nid, ob das sim Nachber äch o gfalli
dr Herr Sauber gseht u ghört's eifach würklech nid so gärn
dass är nümm dä isch wo am meischte Krach macht im Ruum Bärn

E Motor mit em ne Rohr
e Fröid für Oug und Ohr
si blase di Blätter a d'Wang
u näh als motivierti Pensionierti
ds Wätter sälber i d'Hang

So blase di zwe Herbschtloub übere Zuun hin u här
Sauber i Reinigs Garte u umgekehrt, s'isch gar nid schwär
u was ne no vor ds Rohr chunnt, Chatzedräck u Gartezwärge
wird i Nachbers Garte gjagt, scho hüüfe sech di Bärge

E Motor mit em ne Rohr
e Fröid für Oug und Ohr
si blase das Loub zunenang
u als erfahreni Nachbare
duelliere di zwe enang


Doch daderbi isch's nid blibe - di zwe hei's total übertribe
dräie voll uf u düre Rückstoss - gö di Loubbläser wi Raggete los...

So si di zwe Manne gäge Himmu ufe gfloge
zieh ihri Bahn am Firmamänt u itz dröhne si dört obe
me cha nume hoffe, dass si uf di Art glücklech wärde
oder halt verglüie bim Aflug gäge d'Ärde
oder verschwinde irgendwo ir Stärnesuppe
aber das isch mir zimli..

schnuppe

Ändlech
(3:10)

Ha di denn es paar Mal nöime gseh
u scho dänkt mir träffe üs nie meh
doch plötzlech steisch am Bahnhof eifach da
u i mit weiche Chnöi grad näbe dra
so het denn üsi Gschicht en 1. schüüche Afang gno
i weiss no ganz genau, wie wenn & wo

U ändlech bisch bi mir u blibsch dahie
u mir geit’s wäge dir so guet wie nie
wettisch du’s mal nümm so ha
de müesst i di halt la ga
doch eigentlech wüsst i nid so rächt wie

Hüt si mir zäme ungerwägs mir 2
u jede Tag isch ging no alls wie nöi
drum sägi’s mit däm Lied u zwar genau eso wie z’Bärn
i ha di hüt & immer schampar gärn

Ändlech bisch bi mir u blibsch dahie
u mir geit’s wäge dir so guet wie nie
wettisch du’s mal nümm so ha
de müesst i di halt la ga
doch eigentlech wüsst i nid so rächt wie

Ändlech bisch bi mir u blibsch dahie
u mir geit’s wäge dir so guet wie nie
wettisch du’s mal nümm so ha
de müesst i di halt la ga
doch ehrlech gseit wüsst i nid so rächt wie

Ehrlech gseit wüsst i nid so rächt wie

Machet's guet
(2:25)

So, dir liebe Lüt
das wär's de gsi für hüt
drum säg i euch itz merci
u hoffentlech bis gli
so Saite mache Tön
das isch doch eifach schön
berchume gloub nie gnue dervo
am liebschte sing i immer no...

...nid uf Änglisch nid uf Spanisch
nid uf Russisch nid Japanisch
nid uf Hochdütsch nid Chinesisch
wüu das Bärndütsch halt so schön isch

Machet’s guet
u chömet guet hei
hoffe dir heiget
chli Musig i de Bei
ob dir z’zwöit sit oder ellei
machet’s guet u chömet guet hei

Mini Lieder chöit dir mitnäh
di hani nech sehr gärn gä
dir sit es super Publikum
u drum
nimm i o vo euch öppis mit
das isch dr Grund
dass es villich scho gli
es nöis Lied git

... aber nid uf Änglisch nid uf Spanisch
nid uf Russisch nid Japanisch
nid uf Hochdütsch nid Chinesisch
wüu das Chärndütsch halt so schön isch

Machet’s guet
u chömet guet hei
hoffe dir heiget
chli Musig i de Bei
ob dir z’zwöit sit oder ellei
machet’s guet u chömet guet hei

Pirate
(3:31)

Ohni z'hetze Türe schletze ds Schiff ga bsetze
Mässer wetze Sägel setze u üs vom Meer la netze

Chömet mal mir mache e Huufe frächi Sache
Kanone lut la krache, dass alli Lüt erwache
jampadampadam
u nächär zäme lache!

Ohni z'hetze Türe schletze ds Schiff ga bsetze
Mässer wetze Sägel setze u üs vom Meer la netze

Es chönnt üs o ifalle e Strand ga z'überfalle
u Chiselsteine z'chlaue, aber nume di blaue
jampadampadam,
dänk wüu üs die so gfalle!

Ohni z'hetze Türe schletze ds Schiff ga bsetze
Mässer wetze Sägel setze u üs vom Meer la netze

Mir chönnte es Lied erfinge u's em Kapitän vorsinge
u we's üs nid wott glinge ne zum Lache z'bringe
jampadampadam
- de tüe mir ne eifach zwinge! (giligiligili)

Ohni z'hetze Türe schletze ds Schiff ga bsetze
Mässer wetze Sägel setze u üs vom Meer la netze,
jampadampadam...

U üsi Schiffschatz:
Di räblet u fuuchet u gangglet
u chräblet u luuret u zangget
u mauet u strublet u rangget
u chrauet u tublet u muuset
u rauet u tälplet u schmuuset
u schnurrlet u läpplet u pfuuset

Üsi Chatz chunnt geng mit, s'isch dr Hit! jampadampadam...

Ohni z'hetze Türe schletze ds Schiff ga bsetze
Mässer wetze Sägel setze u üs vom Meer la netze

So si mir total frei, mängisch zwar o chli ellei
doch we üs das verlei-det u mir nümm wei
jampadampadam
- gö mir eifach wider hei (padam)

Ohni z'hetze Türe schletze ds Schiff ga bsetze
Mässer wetze Sägel setze u üs vom Meer la netze

So gö mir uf grossi Fahrt...
Weni gross bi, bini e Pirat!