Herzlich willkommen auf der Website von:

STEFAN HEIMOZ - Liedermacher

Bärner Gring
(2:49)

Uf mim Hals da steit e Bärner Gring
gloub mer, das isch gar nid so schlimm
är isch zwar nid so cool u sini Form so alt wi Bärn
i ha ne trotzdäm schampar gärn
Dä Bärner Gring trag i mit Stolz
är isch halt us -ganz hertem Holz
är richtet se-ch nid immer nach em Trend u nach dr Mode
derfür stöh mini Füess fescht uf em Bode
We's schnäll geit, mögi d'Bärner nümme mit
i ha ender ds Gfüehl, si lö sech Zyt
das isch doch öppis angers, villich merksch dr Ungerschid
uf e Gring gheit si si nämlech nid
U chumeni gringsvora derhär
de nimi's gmüetlech wi ne Bär
i wage's fasch nid z'säge, Zürcher, sit mer itz nid bös
i wirde eifach nid so schnäll närvös
E Bärner Gring isch schampar praktisch
es Bärner Mu seit ging, was Sach isch
grediuse, dütlech, troche, ehrlech u diräkt
u das ersch no im schönschte Dialäkt
Zum Glück hani eso ne Gring
stellet nech vor, es gäb ne nümm
chiem i ohni Gring derhär, ja dir würdet nech bsägne
u mir, mir würd's i Hals ine rägne

Uf mim Hals da steit e Bärner Gring
gloub mer, das isch gar nid so schlimm
u sött är dir nid gfalle, ja de muesch doch zuegä, gäll
so eine vergisst me nid so schnäll
so eine vergisst me nid so schnäll,
gäll

Bim Dokter
(1:32)

Guete Tag Herr Dokter Frey
lueget doch mal mini Bei
öppis bisst mi Tag für Tag
s’geit nid wäg, es isch e Plag
S’bisst mi o di ganzi Nacht
alles Chratze het nüt bracht
s’hört nid uf u s‘geit nid wäg
s’stört mi meh als jede Zägg
So geit das zwo Wuche scho
sit i wider zrügg bi cho
vo de Ferie dört am Nil
hälfet mer, es wird mer zvil

U da seit dr Dokter Frey
was öich bisst a öine Bei
ja, das gloubi, das tuet weh
das hani no sälte gseh
Gloubet mer, das muess grad wäg
s’isch ke Chäfer, isch ke Zägg
es git nid emal e Pille
für di böse Schmärze z’stille

Das wo öich da durend bisst
u nech a de Närve schrisst
sit de Ferie dört am Nil...
das isch es Krokodil!

D’Hermine & ihri Termine
(2:09)

D’Hermine het e Sach mit de Termine
zwüschine möge d’Termine vor Hermine nümme ine

Vor Sitzig geit’s zum Witerbildigskurs
u när zum Meeting mit em Urs
vo dört i ds Wohlfüehlseminar
u sithär geit’s so guet, ja klar
U trotz em Ämtli ir Partei
längt’s o no grad ganz schnäll für hei
me sött ja o no ga ichoufe
u rasch mit em Hung ga loufe
Nächär ds Grosi schnäll ga bsueche
u derzue no Ferie bueche
Wellness isch zwar nid dr Hit
für ds Börn-out het si gar ke Zyt

D’Hermine het es Gnusch mit de Termine
zwüschine möge d’Termine vor Hermine nümme ine

Vom Coifför geit’s zum Stüürberater
nächär diräkt zum Psychiater
isch d’Agända mal nid voll
isch’s ihre irgendwie nid wohl
Si isch zwar niene rächt derbi
oder sött scho lang gange si
Isch si z’schnäll ungerwägs, oje
brucht’s e Schutzängel oder zwe
Zum Ässe git’s hüt us dr Dose
e Terminsalat mit Sosse
Me sött halt zwüschine schnäll, gäll
o einisch nei chönne säge, aber äbe, aber äbe

D’Termine hei es Gnusch mit dr Hermine
wüu zwüschine het d’Hermine für d’Termine gar ke Zyt
u d’Termine vor Hermine möge eifach...
nümme mit

Dr Boum, ds Meitschi u dr Hund
(en abverheite Minnegsang)
(3:09)

Es wunderhübsches Meitschi chunnt z’spaziere über ds Land
es wunderhübsches Meitschi chunnt z’spaziere über ds Land
es Lächle i sim Gsicht, es chlyses Hündli a dr Hand
es Lächle i sim Gsicht, es chlyses Hündli a dr Hand

Äs tänzlet über d’Weid u bim ne Boum macht äs e Halt
äs tänzlet über d’Weid u bim ne Boum macht äs e Halt
das Meitschi isch no jung, aber dr Boum dä isch uralt
ds Meitschi isch no jung, aber dr Boum isch scho uralt

I d’Rinde ritzt‘s es Härz, u i ds Härz e Name dri
i d’Rinde ritzt‘s es Härz, u i ds Härz e Name dri
das Meitschi, das bisch du, u dr Boum, das bini
das Meitschi, das bisch du, u dr Boum, das bini

I la ne Zweig la gheie für o dir es Zeiche z’gä
i la ne Zweig la gheie für o dir es Zeiche z’gä
ir Hoffnig, du würdsch ne mit dere Blüete zue dr näh
ir Hoffnig, du würdsch ne mit mire Blüete zue dr näh

Doch si versteit mi nid u schiesst dä Stäcke ihrem Hund
Si versteit mi nid u schiesst dä Stäcke ihrem Hund
dä secklet ihm grad hingernache, läck mir, isch dä dumm
dä hechlet ihm grad nache, läck mir, isch dä Hund dumm

Är chunnt zrügg zu mim Stamm u macht sis chlyne Gschäftli dra
är chunnt zrügg zu mim Stamm u macht sis chlyne Gschäftli dra
ds Meitschi das louft wyter tralalalalalala
ds Meitschi das geit wyter...

Bi mim Stamm git’s... e gälbe Teich
und.... d’Moral vo dere Gschicht:

Mängisch steisch gloub eifach im Seich!

Gringe uf de Plakat
(1:55)

Di Gringe uf de Plakat
hei geng e guete Spruch parat
wüsse geng e gschyde Rat

Teil mache fasch alls richtig
teil näh sech unghüür wichtig
teil rede wi dr Blitz
teil luege chli i d’Schnitz
teil wette düregryffe
teil sötte zersch no riife
teil hei Profil & Stil
u teil si rächt labil...

Di Gringe uf de Plakat
wüsse si mal grad ke Rat
hei si ämu e guete Spruch parat

Teil kämpfe geng ellei
teil säge immer nei
teil bruche Platz für zwöi
teil bschysse wo si chöi
teil hange scho fasch ewig da
u lächle wine Zahnpaschta
Neutral si si uf jede Fall
vor allem nach dr ... Wahl

Di Gringe uf de Plakat
schritte nid so gärn zur Tat
usser ds Interässe sig ender privat

So änderet nid ersch sit hüt
weni bis nüt

...usser de Gringe uf de Plakat

Clochard
(3:35)

Bisch plötzlech zue mer cho
ohni z'frage, eifach so
nid i ha di erfunge
nei, du hesch zue mer gfunge
u itz bisch da - mis Lied
was wär i we's di nid gieb
hätti ke Tegscht, ke Melodie
ja, wi chönnt i zfride si

U we d'mi fragsch woni süsch wär
wi chiem i äch derhär
gloub mer s'isch wahr
i gieng dür ds Läbe als Clochard
We d'mi fragsch woni süsch wär
wi chiem i äch derhär
gloub mer s'isch wahr
i gieng dür ds Läbe als Clochard

Isch d'Wält guet isch si schlächt
i fändi mi nid zrächt
gäb's mini Lieder nid
wo immer bi mer si
ds Läbe hätt mer bös mitgspilt
ja, i wär es truurigs Bild
wine Cowboy ohni Ross
oder e Chünig ohni Schloss

We d'mi fragsch woni süsch wär
wi chiem i äch derhär
gloub mer s'isch wahr
i gieng dür ds Läbe als Clochard
Fragsch mi woni itze wär
wi chiem i äch derhär
dänk als Clochard
ja, klar

Jede het rächt
(2:32)

Es heig eine es Büro ufgmacht us em ne einzige Grund
är seit eifach jedem, wo da ine chunnt:
Dir heit rächt
Är macht das für ne bescheideni Gebühr
u verlangt würklech nid so vil derfür
wüu jede het gärn rächt

D’Presidänte hei rächt u d’Politiker hei rächt u d’Bänker hei rächt
alli alli hei si rächt

So seit är eifach jedem, wo da ine chunnt
a sim Schribtisch jede Tag u jedi Stund
Dir heit rächt
I ha ghört säge, sones Büro räntiert
me verzellt sogar, das Gschäft loufi wi gschmiert
wüu jede het gärn rächt

D’Diräktore hei rächt u d’Generäl hei rächt u d’Hundecoiffeuse
hei rächt alli alli hei si rächt
Die wo ja säge hei rächt u die wo nei säge hei rächt
allialliallialliallialli hei si rächt

Da chunnt chürzlech dr Moser u seit es sig e Sach
är heig drum scho länger mit em Meier Krach
är sig im Rächt
Drufabe chunnt dr Meier, är heig mit em Moser Krach
dr Ma am Schribtisch seit, gät doch däm Moser eis uf ds Dach
dir heit ja rächt

Doch anstatt zäme z’zangge
oder sech süsch irgendwie z’plage
hei dr Moser u dr Meier zäme gredt..
U em Ma im Büro geit’s a Chrage

Das fingt dä zwar nid grächt
- derfür gscheht’s ihm rächt

Di Beschti (für mi)
(1:51)

Es git grossi, es git chlyni
es git grobi, es git fiini
es git jungi, es git alti
es git warmi, es git chalti
es git bruuni, es git bleichi
es git herti, es git weichi
es git luschtigi, s’git ödi
es git schlaui, es git blödi
es git gradi, es git chrummi
es git gschydi, es git dummi
es git stilli, es git läbigi
s’git närvigi u gäbigi
es git frächi, es git schüüchi
s’git verschideni u glychi
Aber di git’s nume einisch für mi

Du wirsch älter u blibsch jung
du steisch ufrächt u nie chrumm
blibsch di sälber u bisch ächt
machsch es sälte allne rächt
mit dir isch es fasch geng luschtig
u zwüschine machsch mi gluschtig
du dänksch unwahrschinlech praktisch
bisch cool u sälte hektisch
du bisch witzig u nie öd
u 08/15 dünkt di blöd
nimmsch nid immer alls so tragisch
u zwüschine bisch chli magisch
du bisch mängisch gfährlech ehrlech
u immer unbeschriblech... wiiblech
U genau du bisch di Beschti (für mi)

D‘Pyramide
(3:05)

Also... loset mal, di Gschicht dahie, di isch würklech (fasch) wahr
dr Chünig Cheops het z’Ägypte vor viertuusig Jahr
wo si Lieblingstochter e Schwyzer het wölle hürate
vor luter Fröid das Hochzyt fasch gar nid chönne erwarte
Es het ne dünkt, di gröschti Pyramide, das wär dänk
es würdigs, wunderschöns u unvergänglechs Hochzytsgschänk

U d’Lüt hei gfunge:
Um di schöni Pyramide
muess me üs benyde
Dass es die hie git
- das isch dr Hit

So hei de sini Sklave halt trotz Gstöhn u chrumme Bei
di riise Pyramide hie i d’Schwyz bracht Stei für Stei
Är het sech überleit wonär se härestelle wetti
da het’s ne dünkt di passt doch wunderbar a d’Niesechetti
u drum heisst das Bouwärch, das isch ja logisch u erwise
nid Jungfrou oder Matterhorn, sondern äbe dr Niese...

U d’Lüt hei gjublet:
Um di riise Pyramide
muess me üs benyde
Dass es die hie git
- das isch dr Hit

Ja, Cheops‘ Tochter het sech im Oberland nidergla
u het mit ihrem Ma hie sehr zahlrich Nachkomme gha
So si mir alli no chli verwandt mit de Pharaone
das erklärt, dass bi üs so schöni u gschydi Lüt wohne...
U bis hüt isch di Pyramide nid so schwirig z’gseh
di bsunderi Form, di gseht me sogar änetem See

U d’Lüt hei gjodlet:
Um di kuuli Pyramide
muess me üs benyde
Dass es die hie git
- das isch dr Hit

No hüt isch me glücklech, dass die das denn eso hei gmacht
Wüu... ohni Bärg hätti’s dr Bou vor Drahtseilbahn nid bracht
S’wär doch dumm, we d’Niesebahn dür ds Flache würdi flitze...
- chiem no derzue, dass me schampar schräg drin müessti sitze..!

Luna
(3:57)

D’Luna isch ganz en edli, wunderschöni Dame
u gheimnisvoll nid nume wäg em myschteriöse Name
Mit ihrne grosse, runde, gschyde, sanfte, brune Ouge
luegt si mi so treuhärzig a, dass i’s chuum cha gloube
Chasch alles vo ihre ha
wüu fründlech wi si isch, seit si geng zu allem ja

Ihre Ougeufschlag hout mi jedesmal fasch um
de bini chli verzouberet, ha weichi Chnöi u drum
stört’s mi o nid, dass si d’Nase überall dristeckt
u bi jeder Glägeheit e nöie Streich usheckt
Chasch alles vo ihre ha
wüu härzlech wi si isch, seit si geng zu allem ja

We si mi gseht, de chunnt si jedesmal sofort cho z’springe
u fröit sech geng am meischte, weni öppis z’ässe bringe
u de berchumi immer es fiins Müntschi, weich u zart
si streckt mir ds Mu entgäge u ihre Damebart
Chasch alles vo ihre ha
si isch zwar zimli eigewillig, doch seit nume ja

Mit ihrem elegante, stolze, sälbschtbewusste Gang
spielt si jedi Schönheitschünigin locker a d’Wang
We si im Gägeliecht so dasteit isch si halt extrem
...fotogen
Chasch alles vo ihre ha
si isch zwar zimli eigewillig, doch seit nume ja
Doch isch si schlau u drum
sälbschtverständlech nume, we si o igseht, warum

D’Luna isch ganz en edli wunderschöni Dame
u gheimnisvoll nid nume wäg em myschteriöse Name
Soviel i weiss git’s ihre Stammboum o scho zimli lang
u we si grad nüt Gschyders z’tüe het, knabberet si dran

Chasch alles vo ihre ha
si seit zu allem I – AAAH!
Doch säg nid si sig dumm
si würd’s verstah u drum
würd’s ihrne länge Ohre
weh tue wi ne Moore
U de schlat si us u hout dir eis a d’Nüss
- und tschüss!

Z’spät & z‘lut
(3:25)

Woni ganz jung bi gsi u spät ir Nacht no Heavy Rock glost ha
isch öpper ine cho, het d’Kassette use gno
Scho hani bösi Wort über mi müesse la erga
"Was isch das für ne Lärm, das hei mer hie nid gärn"

S’isch z’spät & z’lut

U woni de später uf dr E-Gitarre güebt ha
het öpper, das isch nid gloge, grad dr Stecker use zoge
"Wosch würklech nie erwachse wärde, säg itz nid ja"
O üsi Nachbare hei es paar Flüech la fahre

S’isch z’spät & z’lut!

So hani mi z’Tod gnärvt u bi i Himmel ufe cho
zum Petrus ufe gfahre, mit Verstärcher u Gitarre
Doch dä het mer de gseit: "Hie louft das nid eso
Was gub das für nes Bild, bi üs wird Harfe gspilt
Ja, wäg dim Höllekrach flüge mer d’Ängel no dervo
hie git’s ke Rock und Blues"
- Für mi heig’s höchschtens Platz als... Flädermuus

So hei si mi dört obe de halt mit Verdacht entla
Drum bini hinech hie – zwar ohni Harfetön
u glich fing i’s hie irgendwie
– himmlisch schön!